Қаракемер – төрт түлігі тең өрген, берекесі мен бірлігі жарасқан округтердің бірі. Бұл ауылда мал шаруашылығы ежелден ата кәсіп ретінде дамып, тұрғындардың негізгі күнкөріс көзіне айналған. Табиғаты мал өсіруге қолайлы өңірде еңбекқор халық атадан қалған кәсіпті жалғастырып, оның өркендеуіне өзіндік үлесін қосып келеді. Соның нәтижесінде ауыл жыл сайын өсіп-өркендеп, әлеуметтік-экономикалық жағынан дамудың жаңа белестеріне көтерілуде.
Қаракемер ауылында мал шаруашылығын дамытуға ерекше көңіл бөлінеді. Ауыл тұрғындары төрт түліктің барлық түрін өсіріп, олардың өнімдерін тиімді пайдаланып келеді. Осындай шаруашылықтардың қатарында «Нұрсұлтан» шаруа қожалығының орны ерекше. Қожалық ауыл экономикасының дамуына үлес қосып қана қоймай, жергілікті халықты тұрақты жұмыспен қамтып отыр. Мұнда мал басын көбейту, асыл тұқымды мал өсіру және дәстүрлі шаруашылықты заманауи әдістермен ұштастыру бағытында ауқымды жұмыстар жүргізілуде.
Қаракемер тұрғындары тек мал шаруашылығымен ғана шектеліп қалмай, ұлттық құндылықтарды дәріптеуге де белсенді атсалысады. Әсіресе, қазақ халқының ежелден келе жатқан ұлттық спорт түрлеріне қызығушылық жоғары. Ат спортына деген құрмет ауыл халқының бойында ерекше қалыптасқан. Жылқыны баптап, жүйрік тәрбиелеу – үлкен жауапкершілік пен төзімділікті талап ететін іс. Сондықтан ауыл азаматтары бұл бағытта да жоғары нәтижелерге қол жеткізіп келеді.
Жуырда Тараз қаласында өткен ат бәйгесінде Қаракемердің сәйгүліктері жеңіс тұғырынан көрініп, ауыл мерейін үстем етті. Байрақты бәсекеде оза шапқан тұлпарлардың иелері бағалы сыйлықтармен марапатталып, ұтыс ретінде қос ботаға ие болды. Бұл қуанышты жаңалық ауыл тұрғындарының еңсесін көтеріп, мерейін асырды.
«Тараз қаласында өткен ат бәйгесінде сәйгүліктеріміз жеңіс тұғырынан көрініп, ұтыс ретінде қос ботаны қанжығаға байладық. Бұл жеңіс тек біздің емес, барлық Қаракемер ауылының жетістігі», – дейді қожалық қызметкерлері.
Шынында да, бұл жеңіс – ұзақ жылғы еңбектің, жүйелі дайындықтың және ұлттық спортқа деген сүйіспеншіліктің нәтижесі. Сәйгүлікті баптау оңай шаруа емес. Оның күтімі, жем-шөбі, жаттығуы және жарысқа дайындығы үлкен жауапкершілікті талап етеді. Сондықтан мұндай жетістікке жету үшін қажырлы еңбек пен табандылық қажет.
Қазақ халқы ежелден «Береке малда» деп бекер айтпаған. Төрт түлік мал халқымыздың тұрмыс-тіршілігінің ажырамас бөлігі болып саналады. Мал – ырыс пен байлықтың, еңбектің және берекенің символы. Сондықтан ауыл тұрғындары мал шаруашылығын дамыту арқылы өздерінің ғана емес, тұтас өңірдің әл-ауқатын арттыруға үлес қосып келеді.
Қазақтың дүниетанымында түйе малының орны ерекше. Түйе – төзімділігімен, күш-қуатымен және адамға берер пайдасының молдығымен бағаланған түлік. Халқымыз оның сүтінен шұбат дайындап, етін азық еткен, ал жүнінен түрлі тұрмыстық бұйымдар жасап пайдаланған. Сондықтан да түйе ежелден қасиетті түліктердің бірі ретінде құрметке ие болған.
Жыл санау дәстүрінде де түйенің өзіндік орны бар. Қазақ арасында кең таралған аңыз бойынша, он екі жылды бөлісу кезінде түйе аңғалдығынан жылдан құр қалып қойған деседі. Дегенмен бұл аңыз түйенің қадірін кемітпейді. Керісінше, оның еңбекқорлық пен төзімділіктің символы екендігін тағы бір мәрте айқындай түседі.
Сондай-ақ, бәйгеден ұтып алынған қос бота қожалық үшін ерекше сый әрі жақсылықтың нышаны саналады. Қожалық өкілдері бұл олжаны сәттіліктің белгісі деп қабылдап, алдағы уақытта да жаңа жетістіктерге жетуге ниетті. Олардың пікірінше, әрбір жеңіс – тек бір шаруашылықтың ғана емес, бүкіл ауылдың, ауданның абыройын асқақтататын ортақ жетістік екені анық.
Бұған қоса Қаракемер ауылының еңбекқор тұрғындары ата кәсіпті дамыта отырып, ұлттық құндылықтарды сақтап келеді. Мал шаруашылығы мен ұлттық спортты қатар өркендетіп отырған ауыл азаматтары болашақта да толайым табыстарға жетіп, туған өлкенің мерейін үстем ете беретіні сөзсіз.
Осындай игі істер мен табанды еңбектің арқасында Қаракемер ауылының абыройы артып, келешекке деген сенімі нығая түсуде.
