Тараз қаласында Қазақстан мұсылмандары діни басқармасының облыстағы өкілдігі мен облыстық дін істері басқармасының бірлесе ұйымдастыруымен «Имам – ізгі қоғам жаршысы» тақырыбында облыстық имамдар форумы өтті.
Форумға облыс, қала мен аудандардан келген 300-ден астам мешіт имамдары, медресе-колледж шәкірттері, сондай-ақ облыстық дін істері басқармасы мен дін проблемаларын зерттеу орталығының қызметкерлері қатысты.
Форум бағдарламасына сәйкес Қазақстан мұсылмандары діни басқармасының облыстағы бас имамы Б.Мырзагелдиев арнайы баяндама жасаса, облыстық «Һибатулла Тарази» мешітінің наиб имамдары Е.Таласбаев пен Ғ.Жапек және Тараз қалалық «Әулие ата» мешітінің бас имамы Е.Аманбаев V республикалық имамдар форумында қабылданған «Имамның жамағат намазын өткізу тәртібі», «Қазақстан мұсылмандары діни басқармасының рухани (діни және ұлттық) құндылықтарды насихаттаудағы рөлі» және «Қажының рухани келбеті» тұғырнамасы құжаттарының таныстырылымын өткізді.
Сондай-ақ, облыстық дін істері басқармасының бөлім басшысы Е.Ақбай өңірдегі діни тұтастық пен тұрақтылықты нығайту жайында баяндама оқыды.
Жиын соңында жиналған дін қызметкерлеріне алдағы келе жатқан «Құрбан» айт діни мерекесіне байланысты ұйымдастыру жұмыстары мен өзге де мәселелер жеткізілді.
