АҚШ-тың Хьюстон қаласындағы (Техас штаты) орталық саябақтардың бірінде Наурыз мейрамы атап өтілді.
“Құрама штаттарда бұл мерекені жыл сайын Түркия, Босния, Өзбекстан, Қырғызстан, Қазақстан, Түрікменстан, Әзербайжан сынды елдердің тумалары атап өтеді. Саябақта шатырлар тігіліп, ұлттық тағамдар қойылады. Қырғыздар үлкен киіз үй тікті, өзбектер үлкен қазанға палау пісірсе, босниялықтар саябақта қой етін асты. Ал қазақтар манты, бауырсақтар мен Наурыз көже таратты. Оны Маша Хусбек апай әзірлеген. Ол Моңғолияның этникалық қазағы” – деді Техас штатының тұрғыны Гаухар Сембаева.
Саябақтың сахнасында Хьюстондағы «Шаңырақ» жексенбілік қазақ мектебінің балалары өнер көрсетті.
«Моңғолиядағы ауылда Наурызды ұлан-асыр тойлайтынбыз. Міндетті түрде жеті дәмнен көже пісіреміз. Биыл Наурызды қызымыз Ақеркемен қарсы алудамыз. Біз мұнда қонаққа келдік және мұндағылардың қазақ халқының дәстүрлерін ұмытпағанына қуаныштымыз», – деп бөлісті Маша апай.
Әсел Өтеулиева ерікті ретінде Хьюстондағы жексенбілік қазақ мектебінің балаларына домбыра үйретеді.
«Балалар аккордтарды тез қағып алады. Маған олармен жұмыс істеу оңай. Біздің репертуарымызда танымал қазақстандық туындылар бар. Атап айтқанда, «Еркем-ай», «Қамажай» және тағы басқалар бар», – деді ол.
Сондай-ақ, концерттік бағдарламаның соңында ондаған қазақстандық «Қара жорға» әніне би билеп, флешмоб ұйымдастырды.
Айта кетейік, Хьюстонда екі мың қазақстандық тұрып жатыр.
