Қазақ тілі диалектологиясы ғылымының негізін қалаушылардың бірі, ҚР Ұлттық Ғылым Академиясының академигі, профессор Шора Шамғалиұлы Сарыбаев 94 жасқа қараған шағында қайтыс болды, — деп хабарлайды «Zhambylnews» AA.
Қайғылы хабарды Шора Сарыбаевтың туыстары мен әріптестері әлеуметтік желіде хабарлады.
«Бар ғұмырын ана тілі ғылымына арнаған Шора Шамғалиұлы 60 жылдай А.Байтұрсынов атындағы Тіл білімі Институтында еңбек етіп, ондаған ғылым докторы мен кандидаттарын тәрбиелеп, артында отыз томнан астам фундаменталдық еңбек қалдырды. Автордың қазақ тілі грамматикасы, лексика, лексикография, диалектология, тіл білімі тарихы мен есімнаманы қамтитын «Қазақ тіл білімі мәселелері» монографиясы ана тіліміздің хрестоматиясына айналды. Соңғы демі таусылғанша қолынан қаламы түспеген Ш.Ш Сарыбайдың еңбектері өзбек, араб, қырғыз, татар, түрік, әзербайжан т.б. тілдерге аударылып, түркі тілдерінің дамуына да елеулі үлес қосты», — деп жазды Халықаралық адам капиталы институтының басшысы Жанұзақ Әкім аккаунтында.
Шора Шамғалиұлы Сарыбаев 1925 жылы 2 наурызда Ташкент қаласында дүниеге келген. Тіл білімі маманы, филология ғылыми докторы (1974 ж.), профессор. (1979 ж.), ҚР ҰҒА корреспондент мүшесі, (1983 ж.), Қазақстанның еңбек сіңірген ғылым қайраткері (1985). Оның ғылыми зерттеу еңбектері диалектология, морфология, лексикология, лексикография, библиография, тіл тарихы, аударма, есімнама, алтаистика мәселелеріне арналған. 250-ден астам ғылыми мақалалары мен оқулықтары, монографиялары жарық көрген. С.Аманжоловтың тілдегі диалектілерді топтау теориясын әрі қарай дамытып, диалектология саласындағы терминдердің қалыптасуына атсалысқан. «Қазақ тілінің қысқаша этимологиялық сөздігін» (1966), «Қазақ тілінің диалектологиялық сөздігін» (1969), «Жаңа атаулар сөздігін» (1992) құрастыруға қатысқан. 1965 жылы АҚШ-тағы Гарвард корпорациясының мүшелігіне сайланған, ГФР-да (1975), Түркияда (1994) өткен халықаралық конгресс, конференцияларда баяндамалар жасаған. Марқұммен қоштасу рәсімі 3 мамыр күні сағат 10.00-де Алматыдағы Ғылым Академиясы ғимаратында (Құрманғазы көшесі, 29-үй) өтеді.
Cонымен қатар, ФК өкілдерінің хабарлауынша, Шора Сарыбаев — «Қайрат» футбол клубының ең белсенді жанкүйері болған. «Профессор Шора Сарыбаев ұзақ жылдар бойы «Қайрат» ФК туралы тарихи деректерді жинақтаған адам.
Осылайша, Шора Шамғалиұлы халықтың сүйікті командасы туралы бірегей материалдар топтамасын жасады. Оның ерен еңбегінің арқасында «Қайрат» ФК музейі көптеген тың деректермен толықты. «Қайрат» футбол клубы өзінің ең белсенді және құрметті жанкүйерінің дүниеден озуына байланысты Сарыбаевтар отбасына көңіл айтады», — деп хабарланды атақты клубтың ресми сайтында.
Марқұммен қоштасу рәсімі 3 мамыр күні сағат 10.00-де Алматыдағы Ғылым Академиясы ғимаратында (Құрманғазы көшесі, 29-үй) өтеді.
