Назарбаев 92 жастағы Малайзия премьерін сайлаудағы жеңісімен құттықтады
Махатхир Мохамад премьер-министр болып сайланған әлемдегі ең қарт адам атанды. Қазақстан президенті Малайзияның премьер-министрі Махатхир Мохамадқа құттықтау жеделхатын жолдады, деп хабарлайды «Zhambylnews» АА Ақорданың баспасөз қызметіне сілтеме жасап.
Нұрсұлтан Назарбаев Махатхир Мохамадты парламент сайлауында «Үміт альянсы» коалициясының жеңіске жетуімен және Малайзия премьер-министрі лауазымына тағайындалуымен құттықтады.
«Сайлау нәтижелері Сіздің парасатты басшылығыңызбен Малайзияның келешекте жаңа белестерді бағындыратынына халықтың сенім артып отырғанын көрсетті. Бұған Сіздің 1981-2003 жылдарда Малайзияның қарқынды дамуына қосқан өлшеусіз үлесіңіз дәлел бола алады. Қазақстан мен Малайзия арасындағы достық қарым-қатынас жылдан жылға нығайып, жан-жақты өркендеп келеді», – делінген жеделхатта.
Сондай-ақ, Мемлекет басшысы екі ел арасындағы жемісті ынтымақтастықтың одан әрі дами беретініне сенім білдірді.
Соңында Нұрсұлтан Назарбаев Махатхир Мохамадқа жауапты лауазымда табыс, ал Малайзия халқына бейбіт өмір мен бақ-береке тіледі.
92 жастағы Махатхир Мохамад премьер-министр болып сайланған әлемдегі ең қарт адам атанып отыр. Алғаш рет ол 1981 жылы 56 жасында Малайзия премьер-министрі болды. Бұл лауазымнан 2003 жылы кеткен болатын.
