Игілік ауылдық округінің тұрғындары агросалада табысты еңбек етуде

Сарысу ауданы Игілік ауылдық округі әкімі Айбол Бердібаев тұрғындар алдында есеп берді. Бұл туралы «ZhambylNews» Ақпараттық Агенттігі хабарлайды.

Ауылдық округ бойынша халыққа қызмет ететін 2 орта мектеп, 1 балалар өнер мектебі, 1 балабақша , 2 шағын орталық, 2 ауылдық клуб үйі, 2 ауылдық кітапхана, 2 пошта бөлімшесі, 1 фельдшерлік – акушерлік пункті, 1 дәрігерлік амбулатория, 2 саябақ, 1 стадион, 3 футбол алаңы бар. Өткен жылғы 2017-2021 жылдарға арналған нәтижелі жұмыспен қамтуды және жаппай кәсіпкерлікті дамыту бағдарламалары ауылдық округте жақсы көрсеткішке жеткізіліп отыр. Атап айтқанда, былтыр жұмыссыз жүрген 8 азамат өз кәсібін ашу үшін аталмыш бағдарламаның 2-ші бағыты бойынша мемлекет тарапынан 32 млн 300 мың теңге қаражат алды.

Сондай-ақ, тұрғындардың негізгі кәсібі — егін мен мал шаруашылығы. Мүйізді ірі-қара – 1922 бас, қой- ешкі – 21345 бас, жылқы – 622 бас, түйе – 263 басты құрады.

Сонымен қатар, «Қозықырған» шаруа қожалығы  4 млн 300 мың теңгеге 13 бас бие, 1 бас айғыр алып ауыл шаруашылығы саласын дамытуға үлестерін қосып, мал басын көбейту, мал бордақылау істеріне батыл бетбұрыстар жасауда.

Ал округ бойынша 14-29 жас аралығындағы жастар саны 378 болып, ауыл тұрғындарының 14,9 % құрайды. Округ жастарының «Серпін» бағдарламасы аясында  солтүстік, батыс және шығыс өңірлеріндегі жоғары оқу орындарында білімдерін жетілдіріп жатқандары бар.

Жиынға қатысқан жұрт таза ауыз су мәселесін көтерді.