Қазіргі уақытта дін саласы өте өзекті тақырыптардың бірі екені баршаға белгілі. Бүгінгі күні қоғамда дін мәселесіне қатысты материалдар жариялауда түсініспеушіліктерге жол бермеу және дін мәселелері бойынша ақпараттық жұмысты жаңғырту мақсатында Т.Рысқұлов ауданы әкімдігінің ішкі саясат басқармасының ұйымдастыруымен аудандық семинар өтті, — деп жазады “ZhambylNews” ақпарат агенттігі.
Жиынға Республикалық ақпараттық насихат тобының мүшесі, Тараз қаласының «Әзрет-Әли» мешітінің бас имамы Ғ.Ахметов, Жамбыл облысы әкімдігінің «Дін проблемаларын зерттеу орталығы» КММ-нің ақпараттық-түсіндіру бөлімінің инспекторы А.Құлымбетов, аудандық ішкі саясат бөлімінің басшысы Е.Мадияров, Жамбыл облысы әкімдігі «Дін проблемаларын зерттеу орталығының» Т.Рысқұлов ауданы бойынша инспекторы Н.Шәмшіхан, Т.Рысқұлов ауданы әкімдігінің ішкі саясат бөлімінің бас маманы Қ.Қыдыров қатысты.
Құлан жоғары агротехникалық колледжінің акт залында өткен жиын барысында дін саласындағы ақпараттық топтардың қызметі, мақсаты, бұқарамен байланыс мәселелері, өткізілетін іс-шаралардың тақырыптарын таңдау, АТТ мүшелері жұмысының жаңа әдістермен жаңғырту мәселелері, сондай-ақ дін саласындағы ақпараттық түсіндіру жұмыстарын жүргізудің психологиялық және мазмұндық аспектілері талқыланды.
Аталмыш семинарға сонымен қатар, аудандық Орталық мешіттің бас имамы С.Жадраев, аудандық діни ақпараттық-насихаттық топ өкілдері, аудандық ардагерлер мен аудандық мектептердің дінтану пәні мұғалімдері мен психологтары қатысты.
Семинарды ашқан Т.Рысқұлов аудандық Ішкі саясат бөлімінің басшысы сөз алып, аудандағы атқарылып жатқан жұмыстар туралы тоқталып өтті. Сондай-ақ, Алмас Қалдыбекұлы «Дін мәселелері жөнінде АТТ-ның мақсаттары мен міндеттері» тақырыбында баяндама жасады. Арнайы шақырылған маман дәстүрлі емес діндердің қоғамға қалай енетінен, олардың негізгі мақсатын атап өтіп, дәстүрлі емес діни ағымдар, олардың пайда болу шарттары жайы кеңінен ақпарттандырды.
Бұған қоса, семинарда елімізде тұрақты конфессияаралық қатынасты қалыптастыру, діни экстремизмнен келетін қауіптің алдын-алу мәселелері мен оларды шешу жолдары қарастырылып және ұсыныстар жасалды. Жиынға қатысушылар көкейлерінде жүрген сұрақтарын тиісті мамандарға қойып, мардымды жауаптар алды.
