Талас ауданында алтын құрсақты аналардың қатары толықты. Талас ауданының әкімі Қанатбек Мәдібек ауданның көп балалы аналарымен кездесіп, 3 ананы «Алтын алқа», 4 ананы «Күміс алқа» төсбелгілерімен марапаттады , — деп хабарлайды «ZhambylNews» Ақпараттық Агенттігі.
Ат төбеліндей қазақ деген халықтың санын көбейтуге үлес қосып, Ұлы даланың жер жаһанда беделі мен берекесі артуына ықпал етер болашақ ұландарымыз бен қарлығаштарымызды дүниеге әкеліп, тәрбиелеп отырған аналар өздеріне лайықты марапатты мойынға тағынды.
«Еліміздің демографиялық ахуалын жақсартуға қосқан сүбелі үлестеріңіз үшін алғыс білдіреміз! Әр адамның арманы — баласын биіктен көру. Өсіріп отырған ұл-қыздарыңыз еліміздің нағыз патриоты боларына сеніміміз мол. Баршаңызға мықты денсаулық, мызғымас береке-бірлік тілеймін. Отбасыларыңыздың ұйытқысы болып, ақ жаулықты әже атаныңыздар»,-деді Қанатбек Қайшыбекұлы құттықтау сөзінде.
