Облыс әкімдігі жұмыспен қамтуды үйлестіру және әлеуметтік бағдарламалар басқармасына қарасты «Еңбек мобильдігі орталығы» КММ директоры Серік Әлібековтің айтуынша, биыл өңірде кәсіпкерлікті дамыту мақсатында әлеуметтік жағынан осал санаттағы азаматтарға 400 АЕК мөлшерінде (1 572 800 теңге) грант беру жоспарланған, деп хабарлайды Jambylinfo.kz
Барлығы 1008 грант бөлінуі тиіс болса, қазіргі таңда 501 адам өз бизнесін бастауға мүмкіндік алған. Қыркүйек айында бұл тізім тағы 6 азаматпен толыққан.
– Биыл 1008 азаматқа грант беру жоспарланған. Олардың 682- сі көпбалалы отбасылар, 186-сы мүмкіндігі шектеулі азаматтар, 79-ы мүгедек баланы тәрбиелеушілер, 42- сі асыраушысынан айырылғандар, 16- сы атаулы әлеуметтік көмек алушылар болса, 3-і қандастар. Қайтарымсыз грант қаражаты 44 азаматқа мал және құс шаруашылығы бағытында берілсе, 100 азаматқа түрлі қызмет көрсету саласы бойынша үлестіріліп отыр. Ал 56 азамат кондитер және нан өнімдері бағытында, 84 азамат тігін шеберханаларын ашуға алған. 31 адам жартылай фабрикаттар өндіру бағытын таңдаса, 8 азамат жиһаз өндірісін ашпақ ниетте. Қалған 62 грант иесі өндіріс саласын таңдаған болса, 43 азамат қоғамдық тамақтану бағытында жұмыс істеуде, – дейді Серік Айдарұлы.
Қайтарымсыз грантқа кімдер үміткер бола алады?
Басқарма өкілінің айтуынша, әр азамат бұл қолдауды өмірінде тек бір рет ала алады және міндетті түрде әлеуметтік осал топтың біріне жатуы қажет.
Атап айтқанда: мүгедектігі бар адамдар, қандастар, өңіраралық қоныс аударушылар, аз қамтылған отбасылар, көпбалалы жанұя мүшелері, мүгедектігі бар баланы тәрбиелеп отырған азаматтар және асыраушысынан айырылуына байланысты жәрдемақы алушылар грантқа өтініш бере алады.
Ең маңызды талаптардың бірі – үміткердің кәсіпкерлік негіздері бойынша «Бастау Бизнес» жобасынан оқып, тиісті сертификатқа ие болуы. Бұл құжаттың жарамдылық мерзімі – үш жыл.
