Елорда әкімінің орынбасары Ерсін Өтебаев LRT-да жүру тарифін көтеру жоспарда жоқ екенін айтты.
Бүгін Парламент палаталарының бірлескен отырысынан кейін тілшілер LRT-да жол жүру тарифі қаншалықты субсидияланатынын сұрады.
— Субсидияларға келетін болсақ, бұл бағытта толық зерттеуге белгілі бір уақыт қажет етеді, яғни нақты түсінік болуы үшін LRT маршруты толық іске қосылуы керек. Қазір бағасы өзгеріссіз қалды, — деді Е.Өтебаев.
Сонымен қатар ол қоғамдық көлік көп жағдайда өзін-өзі ақтамайтынын айтты.
— Себебі қоғамдық көліктер үнемі әлеуметтік бағытта жүзеге асырылады. Сондықтан қазір жобаның өзін-өзі ақтауы туралы айту әлі ерте. Жалпы, LRT құнын көтеру жоспарда жоқ. Оның тарифі 200 теңге және Қосшы бағытында да осы баға болады, — деді әкімнің орынбасары.
Еске салсақ, LRT жолаушылар үшін 16–17 мамырда ашылады. Көлік күн сайын сағат 06:00-ден 23:00-ге дейін қатынайды. Оператордың бағалауынша, жоба іске қосылған алғашқы кезеңде тәулігіне 25 мыңнан 45 мыңға дейін жолаушы тасымалданады.
Онда жол жүру тарифі 200 теңге деп бекітілген.
