Елорданың жасыл белдеуі 30 мың гектарға дейін ұлғаяды. Қазіргі көрсеткіш 15 мың гектар шамасында, — деп хабарлайды «ZhambylNews» АА ҚазАқпаратқа сілтеме жасап.
Бас қаланың жасыл желегін жайқалту ісі 2021 жылы жаңаша серпін алмақ. Қазір жобалау жұмыстары жүріп жатыр. Бұдан 20 жыл бұрын елорданың іргесіне егілген тал-шыбықтар қазір зәулім ағашқа айналды. Жалпы аумағы 15 мың гектар жасыл белдеу келешекте екі есе ұлғаюы тиіс. Қазір орман арасы жас шыбықтармен толығып жатыр. Биылдың өзінде 511 мың түп тал отырғызылды. Қайың-қарағайы жайқалып тұрған орманда шырша, емен, үйеңкі сынды ағаштардың 36 түрі өседі. Арасында қарақат, шие тәрізді жеміс-жидектер де бар.
«Шілде-маусым айларында біз орманды зиянкестерден қорғасақ, қазір дала өртінен қорғау жұмыстарын жүргізіп жатырмыз. Бізде Нұр-Сұлтан қаласының жасыл белдеуі бойынша 6 пост орналастырылған. Онда 40 адам және 6 су таситын машиналар тәулік бойы жұмыс атқарады. Енді ғана еңсе тіктеп келе жатқан тал-теректерге ерекше күтім қажет. Биыл жауын-шашын мөлшері аз болғандықтан, жұмысшылар тынымсыз тер төгуге мәжбүр. Есесіне бұл бас қалаға жақын ауыл тұрғындары үшін екі қолға бір күрек. Таңның атысы, күннің батысы 900-дей еңбеккер ағаштарды суарып, орман алқабын көркейтуге үлес қосады»,-дейді «Астана орманы» мекемесінің бас агрономы Ардақ Хасенов.
Ал осындағы жұмысшылардың бірі Дәметай өзінің Оразақ ауылының тұрғыны екенін елорда орманында бірнеше жылдан бері жұмыс істейтінін айтады. «Уақытында келіп кетеміз. Айлық жақсы, ай сайын беріп тұрады. Осы талдарды егіп, шырша, күлән ағаштарын егіп, жақсы өсіп тұрса, өте қуанамыз»,-дейді ол. Елордадағы жасыл белдеу аумағы 30 мың гектарға жетсе, 1 миллионнан астам тұрғыны бар бас қала үшін экологиялық ахуал да жақсарады.
Сонда ғана әрбір тұрғынға 250 шаршы метр орман алқабы тиесілі болып, халықаралық талаптарға толық сәйкес келмек. Қазірдің өзінде, Арқаның аңызағы азайғаны анық байқалады. Бұл осы бағыттағы жұмыстардың игі нәтижесі.
