Жамбыл облыстық қан орталығы коронавирустық инфекциясынан емделіп шыққан адамдардың қанынан плазма дайындауды бастады
Жамбыл облыстық қан орталығы коронавирустық инфекциясынан емделіп шыққан адамдардың қанынан плазма дайындауды бастады. Осыған орай, бүгін ауруынан айыққан 8 адам қан тапсыруға келді,-деп хабарлайды «Zhambylnews » АА.
Әлемді дендеген індеттің тарату қарқыны әлі де бәсеңдер емес. Бүгінгі мәліметтерге сүйенсек елімізде коронавирус дертіне шалдыққандардың саны 15542-ні құрады. 9647 адам емделіп шыққан. Қазір еліміздегі карантин шаралары күшейтіліп, сантитарлық талаптарды қатаң сақтау бақылануда. Жүйелі жұмыстар Жамбыл облысында да жүргізіліп жатыр. Шаһардағы қан орталығы дертінен айыққандардың қанынан плазма дайындауды қолға алды.
Ағзада қалған вирустар әрқашан қауіпті бола бермейді. Қазіргі кезде коронавирус дертінен айыққан науқастар көбейіп келеді. Ал COVID-19 инфекциясын жұқтырғандарды емдеу үшін құрамында антиденелері бар қан плазмасы қолданылады. Емделіп шыққан адамдардан алынған қанның компоненттерін құю кез-келген инфекциялық ауруларды емдеудің тиімді тәсілдерінің бірі болып табылады. Бұл жаңа әдіс емес, дәрігерлер әлемде әртүрлі инфекциялық аурулардың өршуі кезінде оны құюды сәтті пайдаланған.
Қазіргі таңда бұл әдісті Германияда, Францияда, АҚШ-та, Ресейде және басқа да елдерде қолданады. Ал Қытай науқастанған адамдардың қан плазмасын пайдаланудың жақсы нәтижелерін көрсетті.
«Ауру барысында адам организмінің иммундық күші белсендіріледі және онда ауру қоздырғыштарына қарсы антиденелер өңдіріледі. Сауыққаннан кейін бұл антиденелер қан плазмасында қалады. Сондықтан оны ауыр халдегі науқасты емдеу үшін пайдалануға болады. Бұл ретте, науқастарда өз иммундық жүйесін толық іске қосуға және антиденелердің пайда болуына дейінгі уақытты ұтып алуға мүмкіндік беретін пассивті иммунитет пайда болады, — дейді облыстық қан орталығының бас дәрігері Гулам Умаров.
Донорларды мынадай талаптар бойынша іріктейді: COVID-19 инфекциясына шалдыққаны туралы медициналық қорытындының бар болуы, COVID-19, АИТВ, В және С гепатиттеріне, мерезге талдаудың теріс нәтижелері.
Емделіп шыққандар қатарындағы еріктілер сауыққаннан кейін 14 күн өткен соң қан тапсыруға шақырылатын болады.
Бір донордан плазманың 2-3 емдік дозасын бірден алуға мүмкіндік беретін аппараттық әдіспен алынады. Бұл өте қарапайым және қауіпсіз процесс. Бұдан әрі стандартты ережелерге сәйкес қан компоненттеріне вирус тазарту рәсімі жүргізіледі.
