Бүгін Сарысу ауданының әкімі Бақытжан Жақсылықов көп балалы аналарға алтын және күміс алқаларды тапсырды. Мұндай құрметке аудан бойынша 25 ана ие болды. Олардың ішіндегі ең жасы 29 жастағы Арайлым Айтымбетова,-деп жазады «Zhambylnews» АА.
Қазақ халқы әрқашан отбасылық құндылықтарды жоғары қойған. Әсіресе, алтын құрсақты аналарды халқымыз ерекше қадірлейді. Қазіргі таңда Сарысу ауданында көпбалалы отбасылар саны 1655, оның 1142-сі алтын, күміс алқа иелері. Ал, Жаңатас қаласында тұратын көпбалалы аналар саны -1380. Оның ішінде 1015 ана 4 бала және одан жоғары балалары бар аналар, яғни мемлекеттік жәрдемақы алатындар.365 ана «Алтын алқа», «Күміс алқа», Батыр ана, 1-2 дәрежелі «Ана даңқы» медаль иелері.
Аудан әкімі Бақытжан Жақсылықов бүгін барлық санитарлық талаптарды сақтай отырып, алтын құрсақты аналарға алтын және күміс алқа мен кітапшаларды салтанатты түрде табыс етті.
«Сіздер тек балаларыңыздың алдында ғана ардақты емессіздер. Сіздер мемлекет алдында үлкен еңбек сіңіріп, мемлекет алдында елдің демографиялық өсуіне үлкен үлес қосып, абыройларыңызды асырдыңыздар», – деді аудан басшысы.
Іс-шара барысында ақ жарма тілектер айтылып, көп балалы аналар мемлекет тарапынан ана мен балаға жасалып отырған қамқорлыққа алғыстарын айтты.
Жалпы осы жолы 25 көпбалалы аналарға алтын және күміс алқалары санитарлық талапқа сәйкес осылай 5-6 анадан бөліп берілуде.
