Димаш Құдайберген Алматыда алғаш рет жеке концертін бермек. 23 қыркүйекте өтетін шоудың билеттері сатылымға шықты. Әншінің айтуынша, сатылым басталған соң, 15 минут ішінде әлемнің 36 елінен Dеars фанаттар тобы билеттер сатып алған. Ал әлемге әйгілі қазақ баласының Алматыдағы концертіне билеттер қанша тұрады? Stan.kz ақпарат агенттігі анықтады.
Ән кеші Алматы орталық стадионында өтеді. Сахна алдында ең адал фанаттар отыратын фан зона мен супер фан зона орналасқан. Димашты жақыннан көргісі келетін фанаттар үшін супер фан зона билетінің құны — 40 мың теңге. Одан кейінгі бірінші және екінші фан зона қонақтары билетті 20-30 мың теңгеден сатып алуға дайын болсын.
Ал Димаштың әнін тыңдасам болды дейтін өзге фанаттар үшін стадиондағы орындар құны — 8 мың теңгеден 30 мың теңгеге дейін барады.
«Билеттер сатылымының басталғаны хабарлаған соң, 15 минут ішінде әлемнің 36 елінен Dеars билеттерін сатып алды. Бүгін билеттер сатылымының 2-ші күні басталды.Одан да көп қонақтар болады деп үміттенемін. Мені қолдағандарыңызға көп рахмет! Барлықтарыңызды жақсы көремін! 23 қыркүйекте Алматыда!» — деп бөлісті Құдайберген.
