2025 жылдың І тоқсанындағы өңірдің әлеуметтік-экономикалық даму көрсеткіштеріне сүйенсек аймақта сауда айналымы 200,8 млрд теңгеге жеткен. Оның ішінде бөлшек сауда 31,6 пайызға, көтерме сауда 2,8 пайызға артқан. Бұл туралы облыс әкімдігінде өткен кеңейтілген мәжілісте айтылды.
Жиында баяндама жасаған экономика және бюджеттік жоспарлау басқармасының басшысы Сандуғаш Абдралиеваның хабарлауынша, барлық салада оң динамика бар.
Ағымдағы уақыт ішінде өңірдің экономикалық өсімі 14,5 пайызды құрады. Бұл өнеркәсіп, ауыл шаруашылығы, құрылыс, тұрғын үй, сауда, көлік, байланыс салаларындағы өсім есебінен қамтамасыз етілген. 38,1 млрд теңге ауыл шаруашылығы өнімі нарыққа шығарылып, қазіргі уақытта дақылдардың 94,4 пайызы егіліпті.
Мал шаруашылығының өнімі 38 млрд теңгені құрады.
Негізгі капиталға 120,5 млрд теңге инвестиция тартылды, бұл өткен жылдың сәйкес кезеңімен салыстырғанда 37,1 пайызға артық.
38,1 млрд теңгеге құрылыс жұмыстары атқарылды.
147,9 мың шаршы метр тұрғын үй пайдалануға берілді. Қазіргі уақытта 2 515 пәтерлі 52 көпқабатты тұрғын үйдің құрылысы жүруде.
Дегенмен, Байзақ, Жамбыл, Талас, Т. Рысқұлов, Мойынқұм, Шу, Қордай аудандарында өнеркәсіп өндірісінің, ауыл шаруашылығы, инвестиция, құрылыс, тұрғын үй, бөлшек сауда көлемі төмен деңгейде қалыптасып отыр.
– Мемлекет басшысы жүтеген міндеттер мен Үкіметтің тапсырмалары мүлтіксіз орындалуы тиіс. Басты мақсат – халықтың әл-ауқатын арттыру, жоспарларды сапалы орындау.
Мемлекеттік бағдарламаларды тиімді пайдалану арқылы мәселелерді жүйелі шешіп, алдағы міндеттерге қол жеткізудің тура жолын білу керек, – деген облыс әкімі берілген тапсырмалар ойдағыдай орындалмаса, нақты шешімдер қабылданатынын жауаптылардың есіне салды.
Сонымен бірге экономикаға инвестиция тарту – аса маңызды мәселе екенін алға тартып, бұған дейін іске қосылған инвестициялық жобалардың жай-күйіне жіті көңіл бөлудің маңыздылығын атап өтті.
