Медицина адамды емдесе, ветеринария-бүкіл адамзатты емдейді. Ежелден мал бағуды кәсіп еткен халқымыз «Малы саудың-жаны сау»-деп, сәлемдескенде ең алдымен «мал-жаның аман ба?»-деп сұраған. Осынау қағиданы ұстаным еткен ата-бабаларымыздың кәсібі әлі күнге дейін жалғасып келеді. Алдындағы малының амандығына, саулығына жауап беретін ветеринария саласы-маңызды салаға айналды.
Кәсіпорынның басты міндеті-аудан аумағында халықты жануарлар мен адамға ортақ аурулардан қорғауды ұйымдастыру болып табылады. Ветеринариялық-санитариялық қауіпсіздікті қамтамасыз ету де олардың құзіретіндегі іс. Сондай-ақ аса қауіпті аурулардың, жануарлардың энзоотиялық ауруларының профилактикасы бойынша іс-шаралар жүргізу де ветеринарлар үшін қалыптасқан тірлік. Осыдан-ақ олардың жұмысы сіз бен біз ойлағандай оңай еместігін бағамдай беріңіз. Дегенмен саланы меңгерген маман иелері өз істеріне мығым. Қай жұмысқа да жауапкершілікпен қарап, жануарларға жанашырлық танытудан танған емес.
Ауданда ауыл шаруашылығымен қатар мал шаруашылығы да қарқынды дамуда. Халықты тағам өнімдерімен қамтамасыз ететін ауыл шаруашылығын одан әрі дамыту мемлекеттік бағдарламалар арқылы іске асуда. Аудан, қала халқын ет-сүт өнімдерімен қамтамасыз етіп отырған шаруашылықтар ең алдымен малдың қауіпті ауруға ұшырамауын ветеринар мамандарымен бірге қадағалап отырады. Ауыл шаруашылығы жануарларының аса қауіпті ауруларына қарсы ветеринариялық-профилактикалық және диагностикалық іс-шаралар жоспарына сәйкес 2025 жылы вакцинация бойынша барлығы 1 045 мың манипуляция және қан сынамасын алу бойынша 446 мың манипуляция жүргізіледі.
2025 жылға бекітілген жоспар бойынша 10 000 бас мүйізді ірі қара, 75 000 бас ұсақ мал, 1 800 бас жылқы, 750 бас түйе, 20 бас шошқа бірдейлендіруден өтуі тиіс.
Аудан аумағында бөлімге 1 қала және 9 ауылдық округте орналасқан ветеринариялық пункттер қарайды. Ветеринария бөліміне қарасты 1 қала және 9 ауылдық округтерінің ветеринариялық пункттері ғимаратпен қамтылған. Аудан көлемінде ветеринария саласының теңгеріміне алынған барлығы 3 биотермиялық шұңқыр бар.
Қазақстан Республикасының 2021 жылғы 30 желтоқсандағы «Жануарларға жауапкершілікпен қарау туралы» Заңы аясында қабылданған нормативтік құқықтық актілеріне сәйкес иесіз қаңғыбас жануарларды аулау жұмыстары жүргізілуде.
2025 жылы қаңғыбас иттер мен мысықтарды аулауға және жансыздандыруға жергілікті бюджеттен қаржы бөлініп, конкурс нәтижесімен қызмет көрсетуші ретінде Жамбыл облыстық ветеринариялық станциясы анықталды. Ит аулауға 1 жұмысшы алынды. Иесіз ит-мысықтарды аулау жұмыстары да ветеринария саласының мамандарына жүктелген міндет.
Сонымен қатар, ветеринар мамандар ветеринариялық іс-шаралар жүргізуімен қатар ауыл тұрғындарына иелігіндегі ит-мысықтарды қағидаға сәйкес байлап ұстау жөнінде үнемі түсіндірме жұмыстары жүргізуде. Аудан аумағында иесіз қалған қаңғыбас ит-мысықтарды уақытша ұстауға арналған жеке тұлға есебіндегі 1 панажай бар. Қорытындылай келе, ауданның ветеринария саласының мамандары алдағы уақытта да іс-шара жоспарына сәйкес тиісті міндетін толыққанды атқарып, саланың ақсамауына жұмыс жүргізетін болады.
Төрт түлікпен біте қайнасып өмір сүріп, олардың еті мен сүтін, терісін қажетімізге жаратқандықтан, малдың кеселі өзіміздің денсаулығымызға да кесірін тигізуі мүмкін. Академик К.Скрябиннің «Медицина-адамды, ал, ветеринария-бүкіл адамзатты емдейді»-деген қанатты сөзінен ветеринария саласы атүсті қарауға болмайтын, өте жауапты мамандық екендігін аңғаруға болады.
Аудан аумағында бүгінгі күнге эпизоотиялық жағдай тұрақты.
