«AMANAT» партиясының Жастар қанаты – «Жастар рухы» бастамасымен ұйымдастырылған «Taza Qazaqstan» экологиялық Road-эстафетасы Жамбыл облысына жетіп, Меркі ауданында жалғасын тапты.
Іс-шара аясында Аспара ауылы мен Меркі ауданы арасындағы Батыс Қытай – Батыс Еуропа халықаралық автодәлізінің екі жағы қоқыстан тазартылды. Бұл – тек тазалық шарасы ғана емес, елдің экологиялық мәдениетін қалыптастыруға бағытталған маңызды қадам.
Акцияға аудан әкімінің орынбасары Ернар Әбілдаев, Меркі аудандық «AMANAT» партиясының мүшелері, мәслихат депутаттары, «Жастар рухы» ұйымының белсенділері мен ерікті жастар қатысты. Барлығы 70-ке жуық тұрғын табиғатты қорғау жолында бір мақсатқа жұмылып, тазалықты нақты әрекетпен көрсетті.
«Taza Qazaqstan» – Мемлекет басшысы Қасым-Жомарт Тоқаевтың тапсырмасымен басталған ауқымды экологиялық науқанның бір бөлігі. Президент Жолдауында тазалықты өмір салтына айналдыру қажеттігін атап өтті. Бұл эстафета – сол ұстанымның нақты көрінісі.
Әрбір тазартылған шақырым – Қазақстанның жасыл болашағына жасалған нақты қадам. Бұл – экологияның жеке емес, жалпыұлттық мәселе екенін көрсететін бастама.
Жастар – өзгерістің қозғаушы күші. Олар экологиялық патриотизмді қалыптастырып, табиғатқа деген жауапкершілікті іс жүзінде дәлелдеп келеді.
«Taza Qazaqstan» – бұл уәде емес, әрекет. Бұл – табиғатты сақтау жолындағы бірлік пен жауапкершілік мәдениетінің көрінісі.
