Жазғы демалыс кезеңінде мектеп жанындағы лагерьде балалардың қауіпсіздігін қамтамасыз ету мәселесіне ерекше көңіл бөлінуде. Осы мақсатта оқушылар арасында қауіпсіздік мәдениетін қалыптастыруға бағытталған арнайы түсіндірме жұмыстары ұйымдастырылды. «Қауіпсіздік әліппесі» үйірмесінің жетекшісі Камисбаева Г. лагерь тәрбиеленушілерімен кездесіп, қауіпсіздік ережелерін сақтау бойынша жан-жақты ақпарат берді.
Іс-шара барысында оқушыларға лагерьдегі күн тәртібін сақтау, жол қозғалысы қауіпсіздігі, өрттің алдын алу шаралары, су айдындарындағы қауіпсіздік талаптары, жеке бас гигиенасын сақтау және төтенше жағдайлар кезінде дұрыс әрекет ету жолдары кеңінен түсіндірілді. Сонымен қатар балаларға түрлі өмірлік жағдайларда сақтық танытудың маңызы айтылып, қауіптің алдын алу жолдары жөнінде пайдалы кеңестер берілді.
Түсіндіру жұмыстары барысында оқушылар белсенділік танытып, өздерін қызықтырған сұрақтарға жауап алды. Балалар қауіпсіздік ережелерін сақтау тек өздерінің ғана емес, айналасындағы адамдардың да амандығы үшін маңызды екенін түсінді. Мұндай шаралар жас ұрпақтың жауапкершілік сезімін арттырып, қауіпсіз мінез-құлық дағдыларын қалыптастыруға ықпал етеді.
Қауіпсіздік – әрбір баланың өмірі мен денсаулығын қорғаудың басты кепілі. Сондықтан жазғы демалыс кезінде оқушылардың уақытын тиімді ұйымдастырып қана қоймай, олардың қауіпсіз ортада демалуына жағдай жасау – білім беру ұйымдарының маңызды міндеттерінің бірі болып табылады.
