Чемпиондыққа жету – бір күндік еңбектің нәтижесі емес. Ол күн сайын өзіңді жеңуден, тәртіпті сақтаудан, алға қойған мақсатыңа адал болудан қалыптасады. Спортта әрбір жеңістің артында тынымсыз дайындық, табандылық және үлкен жауапкершілік тұрады. Елдің де табысты болашағы дәл осындай ұстанымнан – әр азаматтың белсенділігі мен саналы таңдауынан қалыптасады.
Мен спортшы ретінде адал бәсекенің, тәртіп пен әділдіктің маңызын жақсы білемін. Жарыс алаңында әр спортшы өз мүмкіндігін көрсетіп, белгіленген ережені сақтап, қарсыласына құрметпен қарауы керек. Бұл қағидаттар тек спортта ғана емес, қоғамдық өмірде де өз мәнін жоғалтпайды.
Осы тұрғыдан алғанда, Құрылтай сайлауы – ел болашағына қатысты азаматтық жауапкершілікті танытатын маңызды қадам. Сайлау арқылы әр азамат өз пікірін білдіріп, қоғамның дамуына қатысты ұстанымын көрсете алады. Өйткені елдің ертеңі – тек мемлекеттік органдардың немесе жекелеген азаматтардың емес, баршамыздың ортақ жауапкершілігіміз.
Спортта чемпион болу үшін өзіңмен күн сайын күресесің. Бір жаттығудағы нәтижеңе тоқмейілсімей, келесі белеске ұмтыласың. Мемлекеттің дамуы да дәл сондай үздіксіз еңбекті қажет етеді. Бүгінгі дұрыс таңдау – ертеңгі мүмкіндіктердің негізін қалайды.
Сондықтан әр азамат ел тағдырына бейжай қарамай, өз таңдауын жауапкершілікпен жасауы маңызды. Қоғамдағы оң өзгерістер де, жарқын бастамалар да әрқайсымыздың белсенді азаматтық ұстанымымыздан басталады.
Әр жеңіс үлкен еңбектен басталады. Ал жарқын болашақ – бірлікке, жауапкершілікке және саналы таңдауға негізделеді.
Бірлігіміз бекем, мақсатымыз айқын, болашағымыз жарқын болсын!
Құлажан Тоғайбаев Ерғалиұлы, Көкпардан ҚР ұлттық құрамасының мүшесі, спорт шебері,
әлем чемпионы, «Алтын тұғыр» ұлттық сыйлығының иегері
