Астанада дәрігерлер тағы бір баланың менингококк инфекциясын жұқтырғанын растады
6 маусымдағы жағдай бойынша Астананың балалар жұқпалы ауруханасында менингитпен екі бала жатыр. Бұл туралы аурухананың бас дәрігері Сәуле Нұрашева айтты, — деп хабарлайды «Zhambylnews» АА Tengrinews.kz сайтына сілтеме жасап.
«Ауруханаға 29 мамырда түскен бірінші баланың жағдайы жақсы, бала анасымен, қажетті ем алып жатыр. Ал 4 маусымда түскен балаға диагноз қойылды: менингококк инфекциясы. Жағдайы тұрақты, ем алып жатыр», — деді дәрігер.
Еске сала кетейік, 4 маусымда Астанада екі жасар бала менингококк инфекциясын жұқтырды деген күдікпен ауруханаға жатқызылған болатын. «Ұл бала, 2 жыл 1 айлық, менингококк инфекциясын жұқтырды деген күдікпен ауруханаға түсті. Сараптама нәтижелерін күтіп отырмыз. Денесінде бөртпелер жоқ, бірақ жансақтау бөлімінде жатыр», — деген еді дәрігер.
Айта кетейік, жыл басынан бері елімізде 13 адам менингококк инфекциясынан қайтыс болды.
Мұның алдында денсаулық сақтау министрі Елжан Біртанов менингококк инфекциясына байланысты карантин жарияланбайтынын айтқан еді.
