Сарысу ауданында жылыту маусымының дайындық жұмыстары бекітілген жоспар бойынша жүргізілуде, — деп хабарлайды «ZhambylNews» Ақпарат Агенттігі Сарысу ауданы әкімдігінің баспасөз қызметіне сілтеме жасап.
Білім саласы нысандарында 28 мекеме көмірмен, 6 мекеме соляркамен және 10 мекеме қалалық орталық қазандық жылуымен, 2 мекеме электр қуатымен жылытылады. Бүгінгі таңда қазандықтарға от жағатын машинистер, операторлар және жауапты қызметкерлер, барлығы 145 адам оқу курсттарынан өткізілді.
Спорт саласы нысандарының кіші қазандықтарына жылу жүйелері мен ғимарат ішіндегі инженерлік жүйелерге толық ревизиялық жұмыстар жүргізілуде.
Мәдениет саласында қазіргі кезде барлық нысандарда жөндеу жұмыстары аяқталып, 100% қыс мезгіліне дайын.
Сондай-ақ, денсаулық саласында 27 медициналық нысандар бар. Олардың бірқатары қалалық орталық қазандық жылу жүйесі арқылы жылумен қамтамасыз етілсе, Саудакент ауылдық ауруханасының жылу қазандығы көмірмен, ал қалған дәрігерлік амбулаториялар, фельдшерлік акушерлік пункттер, яғни 21 нысанға жеке пеш жылу жүйесі арқылы жылу берілетін болады.
«Жаңатас-Су-Жылу» КМК-нына 2018-2019 жылғы қысқы кезеңге бекітілген іс-шаралар жоспары бойынша қалалық орталық қазандыққа және жылу, ауыз су, кәріз жүйелеріне ағымдағы жөндеу жұмыстарын жүргізу мақсатында 43,3 млн теңге жоспарланып, арнайы бригадалар жөндеу жұмыстарын аяқтады.
Сонымен бірге, Сарысу аудандық электр жүйесі учаскесі де қыс мезгіліне дайындық жұмыстарын пысықтауда. Жалпы алғанда, аудан бойынша 9856 жеке тұлға және 457 заңды тұлға тәулігіне, жаз кезінде 2,6-мгвт электр қуатын пайдаланса, қыс маусымында ол 3,5-мгвт-қа артады.
Жоспар бойынша қысқы жылыту маусымына дайындық 1 қазан күні толық аяқталады.
Айта кетейік, 2018-2025 жылдарға 173 елді мекенді газдандыру жоспарланып отыр. Оның ішінде Байзақ ауданында 21 елді мекен, Жамбыл ауданында 16 е.м., Жуалы ауданында 19 е.м., Қордай ауданында 29 е.м., Меркі ауданында 6 е.м., Мойынқұм ауданында 12 е.м., Сарысу ауданында 18 е.м., Талас ауданында 14 е.м., Тұрар Рысқұлов ауданында 20 е.м. және Шу ауданында 18 елді мекен газдандырылады.
