Алматыда өткен VI халықаралық шығармашылық байқауында жамбылдық мұғалімдер жеңімпаз атанды
«Дарын» республикалық ғылыми-практикалық орталығы мен «Қазақстанның математика пәні мұғалімдерінің ассоциациясы» республикалық қоғамдық бірлестігінің ұйымдастыруымен 1-2 желтоқсан аралығында Алматы қаласында математика, физика және информатика пәндері мұғалімдерінің VI халықаралық шығармашылық байқауы өтті. Бұл туралы «ZhambylNews» Ақпараттық Агенттігі хабарлайды.
Талантты және шығармашыл ұстаздарды анықтау мақсатында ұйымдастырылған олимпиадаға Жамбыл облысынан 11 мұғалім қатысты. Екі бөлімнен тұрған байқау шарты бойынша ұстаздарға теориялық және методикалық есептер берілді.
Халықаралық байқаудың қорытындысы бойынша өңір намысын қорғаған 6 педагог жүлделі орындарға ие болып, командалық есепте III-орынды жеңіп алды. Атап айтсақ, жүлделі II-орынды Тараз қаласы ерекше дарынды балаларға арналған мамандандырылған «Дарын» мектеп-интернатының математика пәнінің мұғалімі Жомарт Рысбаев иеленсе, Тараз қаласындағы №49 Ы.Алтынсарин атындағы мектеп-гимназиясының математика пәні мұғалімі Айбек Мұратбаев III-орынға лайық деп танылды. Ал Тараз қаласы ерекше дарынды балаларға арналған мамандандырылған «Дарын» мектеп-интернатының математика пәнінің мұғалімі Мұхтар Талқанбаев, аталған мектеп-интернаттың физика пәнінің мұғалімі Дарья Чижевская, Тараз қаласындағы №49 Ы.Алтынсарин атындағы мектеп-гимназиясының математика пәні Сұлтанғазы Қайырбай, Тараз қаласындағы №45 қазақ классикалық гимназиясының математика мұғалімі Бауыржан Кеңесов IV-орынды бөлісіп алды.
Педагогтарды жеңістерімен құттықтаймыз!
