Шу ауданында 96 жастағы кейуана екпе салдырды

0
12

Шу ауданына қарасты Жаңа жол ауылының 96 жастағы тұрғыны Ифрат Халяпова 12 мамыр күні «Спутник-V» вакцинасының алғашқы дозасын салдырыпты. Жасы жүзге таяп қалса да жеке басының ғана емес, туыстарының да саулығына алаңдаған кейуана енді міне екпенің екінші дозасын қабылдады, — деп хабарлайды “ZhambylNews” AA.

Ауылдағы дәрігерлік амбулаторияның учаскелік медбикесі Гүлмира Алиеваның айтуынша, Ифрат Нуруллақызының жағдайы бірқалыпты.

«Алғашқыда тұрғындар вакцина салдыру үшін аудан орталығына баруға мәжбүр болатын. Сәуір айынан бастап ауыл тұрғындарына жергілікті жерде сала бастадық. Тұтастай алғанда ауылда 2910 адам тұратын болса, оның 1341-і вакцина салдыруы тиіс. Бүгінгі таңда 572 тұрғын ерікті түрде екпе салдырды. Олардың қатарында Ифрат Халяпова да бар. Өзінің ғана емес, немере-шөберелерінің де денсаулығына алаңдап, екпе салдырған апамыздың бұл әрекеті Жаңа жол ауылының ғана емес, тұтас өңіріміздің тұрғындарына үлгі болуы керек деп ойлаймын. И.Халяпова бұған дейін денсаулығына байланысты шағымданған емес. Екпе салдырмас бұрын әжейдің денсаулығының дұрыстығына әбден көз жеткізіп, қажеті шаралардың барлығын жасадық. Күнделікті хәл-жағдайын біліп тұрамыз» — дейді медбике.

Ашаршылық жылдарындағы ауыр азапты көзбен көрген Ифрат Нуруллақызы Ұлы Отан соғысы кезінде де тылда еңбек етіп, жеңісті жақындатуға айрықша үлес қосқандардың бірегейі.

Сондай-ақ бұрынғы жылдары қант қызылшасымен аты шыққан Шу ауданының беделді қызылшашыларының бірі болған. Балтамырдың бабын тауып, құрметке де бөленген. Бүгінгі таңда 6 баласынан өрбіген 13 немере-шөберелерінің ортасында шаттыққа толы күн кешіп отырған әжеміз аурудан айығудың жалғыз жолы — екпе салдыру екенін айтады.

«Мен екпені өзім үшін салдырған жоқпын. Артымнан ерген ұл-қыздарым мен немере-шөберелерімнің денсаулығына алаңдадым. Бұл індеттен жапа шеккендерді көзімізбен көрдік. Жақыныңнан айырылудың қаншалықты ауыр екенін жақсы білемін. Сондықтан кеш болмай тұрғанда вакцина салдырып, кеселдің жолын ертерек кесу керек» — дейді И.Халяпова.

Расымен де, шулық кейуананың бұл ісі көпке үлгі болуы тиіс. Ең алдымен, екпе салдырмас үшін түрлі сылтау ойлап тауып жүргендер үлгі алса дейміз.

Жауап калдыру

Please enter your comment!
Please enter your name here