Шу ауданының әкімі Нұржан Календеров құқық қорғау органдары қызметкерлерінің қатысуымен жергілікті кәсіпкерлермен кездесу өткізді, — деп жазады “ZhambylNews” AA.
Ауданымыздағы эпидемиологиялық ахуал баяндалған отырыста соңғы көрсеткіштер мәлім етілді. Одан белгілі болғандай, аудан аумағында құрылған 5 арнайы топпен жыл басынан бері 229 рейд ұйымдастырылып, 96 заң бұзушылық анықталған. 96 тұлғаға 6 млн 534 мың теңге көлемінде айыппұл салынған.
Бұдан бөлек жұқпалы індетті емдеу және оқшаулау шараларын ұйымдастыру мақсатында әзірленген 180 төсек қорының 78 пайызы бос емес.
Аудан әкімі өз сөзінде елдегі эпидемиологиялық ахуалды біле тұра, санитарлық талаптардың сақталуын бақылау мақсатында тынымсыз жүргізіліп келе жатқан тексерулерді елемегендерге жаза, жауапты басшыларға шара қолданылатындығын ескертті.
— Эпидемиологиялық жағдайдың қаншалықты күрделі екенін біле тұра, жиын-той өткізуді тоқтату керек. Тойға жан-жақтан тамыр-таныс жиналады. Бұған тосқауыл қойылмаса, қалған тірліктің бәрі бекер. Біз барыншы қатаң, барынша түсіндіріп те айтып жатырмыз. Тыйым да салдық. Соған қарамастан әлі де қарапайым сақтық нормаларын елемей отырмыз. Жоғарыда айтылған қорқынышты көрсеткіштер тәртіпке бағынбағанның салдары. Ендігі кезекте мобильді топтардың жұмысын күшейтіп, ауданымыздағы әр тойхананың алдына бір-бір бақылаушыдан қою керек, — деді аудан басшысы.
