2026 жылғы 21 қаңтарда Қазіргі заман гуманитарлық-техникалық колледжінде «Заң мен тәртіп» жобасы аясында «Барыңды бағала» атты студенттермен кездесу өтті.
Іс-шараның негізгі мақсаты – жастар арасында құқықтық мәдениетті қалыптастыру, заң талаптарын сақтау, қоғамдық тәртіпке жауапкершілікпен қарау, сондай-ақ тарихи және рухани құндылықтарды бағалауға бағыт беру.
Кездесуге мемлекеттік мекемелердің өкілдері, құқық қорғау органдарының қызметкерлері, қоғамдық ұйым мүшелері, колледж ұжымы мен студенттер қатысты.
Іс-шара «Қоғамдық келісім» КММ басшысы Жинақбаева Мубарак Қасымқызының модераторлығымен өтті. Мекеме басшысы өз сөзінде жиынның «Заң мен тәртіп» жобасы аясында ұйымдастырылып отырғанын атап өтіп, кездесудің маңыздылығына тоқталды.
Жастармен жүздесуде облыстық Қазақстан халқы Ассамблеясы Аналар кеңесінің төрайымы Эльмира Мырза-ғали сөз сөйлеп, Аналар кеңесінің жастар арасында құқықтық тәрбие беру бағытындағы жұмыстары туралы баяндады. Сонымен қатар «Барыңды бағала» жобасының мазмұны мен әлеуметтік маңызы таныстырылып, тақырыпқа сәйкес слайд көрсетілді.
Жиынға облыстық мәдениет және тілдерді дамыту басқармасына қарасты «Тарихи-мәдени ескерткіштерді қорғау және қалпына келтіру дирекциясы»КММ басшысы Сауран Қалиев тақатысты. Ол өзінің «Өткеннен сабақ, заңнан бағдар: жастар және тарихи мұра» тақырыбында жасаған баяндамасында тарихи-мәдени мұраларды сақтау және құнды петроглифтердің сыртына жазу, сызу секілді келтірілген зиян үшін тартылатын құқықтық жауапкершіліктің түрлерімен таныстырды. Сондай-ақ, заң талаптарын орындаудың өзара байланысына және тағылымды өлке Тараздың тарихи аймақ екенін тілге тиек етті.
Жастармен өткен жиынға Жамбыл облысы Полиция департаменті Қоғамдық қауіпсіздік басқармасының ювеналды полиция тобының ерекше тапсырмалар жөніндегі аға инспекторы, полиция майоры Азат Жанабекович Пирматовта қатысты.
«Заң мен тәртіп» жобасы аясында «Барыңды бағала» кездесуінің қоғамдық маңызы туралы айтып, жастар арасындағы құқық бұзушылықтың алдын алу, кәмелетке толмағандардың жауапкершілігі және қоғамдық тәртіпті сақтау мәселелеріне тоқталды. Кездесу барысында тақырыпқа сәйкес бейнематериал көрсетілді.
Ал, жастарға «Бес нәрседен қашық бол» деген өзінің баяндамасымен бөліскен ҚХА Аналар кеңесі төрайымының орынбасары, Республикалық дүнген аналар кеңесінің төрайымы Сара Даузова
жастардың теріс әдеттерден аулақ болып, салауатты сана қалыптастыруының маңызын жастаға жіті түсіндуге тырысты.
Жиын Қазіргі заман гуманитарлық-техникалық колледжінің директоры Фарида Нақыш жастардың құқықтық сауаттылығын арттыру білім беру ұйымдарының басты міндеттерінің бірі екенін айтып, колледжде осы бағытта ақпарат берген мекеме ұжымына алғысын білдірумен қортындылады.
Іс-шара соңында белсенді студенттер өз пікірлерін білдіріп, жобаға ерекше атсалысқандар марапатталды. Жастармен өткен жүздесу «Қоғамдық келісім» КММ қызметкері Қалижан Саркеевтің орындауында шырқалған «Қазақ елі» әні тыңдау және естелік суретке түсумен түйінделді.
