Қоғамның адалдыққа бағыт алар кезі келді

0
22

Жамбыл облысында жұмыс сапарымен жүрген ҚР Сыбайлас жемқорлыққа қарсы іс-қимыл агенттігі төрағасының кеңесшісі Жазира Жылқышиева мен «Парасат жолы» республикалық орталығының жетекшісі Сәдібек Түгел агенттіктің облыс бойынша департаменті басшысының бірінші орынбасары Равиль Төлебаевпен бірге бүгін Жамбыл ауданына барып, бірқатар мекемені аралап, тыныс-тіршілігімен танысып, аудан ардагерлерімен, зиялы қауым өкілдерімен кездесу өткізді, — деп жазады “ZhambylNews” АА.

Басшылардың жұмыс сапары аудандық «Сервистік әкімдіктен» басталды. Аудан әкімі Сәкен Арубаев оларды кеңсе жұмысымен етене таныстырды. Онда отырған әкімдіктегі бөлім мамандарының функционалдық қызметі туралы айтты. Мамандар жергілікті тұрғындарға ашық әрі сапалы қызмет көрсетіп жатқанын жеткізді.

Басшы сөзін жалғаған «Аса – адалдық алаңы» жобалық кеңсесінің жетекшісі Жандар Тоқсаба кеңсе жұмысы туралы кеңінен баяндады. Ауылдық округтердегі адалдық елшілерінің сыбайлас жемқорлықтың алдын алу, оны болдырмау, онымен күрес бағытында жұмыс жүргізіп жатқанын тілге тиек етті. Адалдық елшілері өз кезегінде ауыл тұрғындарының мәселесін шешуге атсалысып жүргендерін, аудан әкімдігі тарапынан қолдау көрсетіліп жатқанын, өздеріне артылған жауапкершілікті сезінетінін алға тартты.

Сервистік әкімдіктен шыққан топ аудандық орталық кітапханаға бет алды. Кітапханада ашылған «Парасат жолы» орталығында зиялы қауым өкілдерімен кездесті. Олармен елдегі сыбайлас жемқорлық турасында әңгіме өрбітті.

– Қазақ «іштен шыққан жау жаман» деп бекер айтпаса керек. Жемқорлық – халықты қанау, ұлтты тонау, Отанды сату деген сөз. Бұған ұлт болып ұйысып, жұрт болып жұмылып тойтарыс бермесек, ел болып дамуымыз бұлыңғыр. Адалдық – ұлттық идеямыз, оны насихаттау, дәріптеу ұлттық қозғалысқа айналуы тиіс. Біздің алдымызда үш міндет тұр. Біріншісі – ұлттық ділді өзгерту. Екіншісі – тұрмыстық жемқорлықты жою. Осы екі міндетті орындасақ, кландық сыбайлас жемқорлық жойылады, – деген ол «Парасат жолы» республикалық орталығының жұмысына тоқталып, ардагерлерді құлағдар етті.

Басқосуда аудандық ардагерлер кеңесінің хатшысы Сәрсен Күзербаев түрлі салада қызмет ететін қызметкерлер антына берік болса деген тілегін тілге тиек етті. Ал, ардагер ұстаз Алтынхан Сапарбеков: «Елдегі жемқорлық идеологияның кемшін тұсы. Идеология әлсіз. Мықтап қолға алу керек. Теледидардан «Бірге болайық», «Қалаулым» секілді рухани азғындыққа апаратын бағдарламаларды көрсетуді қою керек. Ақша, дүние қуып кеткен заманда қоғам мен билік арасындағы байланыс та әлсіз. Қоғамды имандылыққа, ізгілікке, бауырмалдыққа баулу қажет» – деп, ауданда егін су мәселесі түйткілді болып тұрғанын айтты. Бұған Сәкен Қаланұлы бұл мәселені шешу бағытында тиісті жұмыстар аудан көлемінде жүргізіліп жатқанын жеткізді.

Жиында ауданның бас имамы Ғайырфулла қажы Әмірбеков, Аса ауылдық ардагерлері кеңесінің төрағасы Рахымбек Жапаров салмақты сөз сабақтады.
Жұмысшы топтың жергілікті жұртшылықпен кездесуі Жамбыл аудандық білім бөліміне қарасты «Техникалық шығармашылық және кәсіби бағдар беру орталығында» жалғасты. Жазира Жақсылыққызы жиналған көпшілікке сыбайлас жемқорлыққа қарсы іс-қимыл заңына өзгерістер енгізілгенін, заң қатаңдатылғанын, жемқорларға рақымшылық қарастырылмағанын, бұрындары басымдық жазалауға берілсе, соңғы үш жылда алдын алу шаралары қолға алынғанын баяндады.

Оның сөзін жалғаған Сәдібек Түгел, облыстық «Jambyl» телеарнасының жүргізушісі Ғайни Әлімбекова адалдық қағидаттары, рухани құндылықтар жайында сөз қозғап, ойларын ортаға салды.

Сапар соңында жұмысшы топ аудан активімен кездесті. Аудан әкімдігіндегі бөлімдердің сыбайлас жемқорлықтың алдын алу бойынша атқарған жұмысын байыппен тыңдап, саралады. Жүргізілген жұмысты оң бағалады. Мемлекеттік қызметкерлер кез келген жағдайда мінсіз болуы керектігін тілге тиек етті. Қызметкерлер біліктілігін арттыруы үшін арнайы оқу курстарына баруы қажет екенін көлденең тартты.

Жауап калдыру

Please enter your comment!
Please enter your name here