Бүгін «Nur Otan» партиясының Жамбыл облыстық мәслихатындағы депутаттық фракциясының отырысы өтті. Онда депутаттық фракция жетекшісінің орынбасары Фарида Жүнісова фракцияның 2021 жылдың 6 айында атқарған жұмыстарын қорытындылады, — деп хабарлайды “ZhambylNews” ақпарат агенттігі.
Жалпы биылғы жылы партияның облыстық мәслихатындағы депутаттық фракциясының 30 мүшесімен 3 отырыс өтті. Онда партияның Сайлауалды бағдарламасының орындалу барысы қаралды. Жыл басынан фракцияның 9 депутатының Жол картасындағы өздеріне тиесілі көрсеткіштері бойынша атқарған жұмыстары жайлы есебі тыңдалды.
Сондай-ақ, Жол картасындағы көрсеткіштерді саралау, талдау және туындағанмәселелерді дер кезінде талқылай отырып, шешімін табуға бағытталған жаңа 10 қоғамдық кеңес құрылды. Кеңес құрамына фракция мүшелерінің барлығы енген. Жыл басынан 12 кеңес өткізіліп, онда барлығы 26 мәселе қаралды. Бұл бойынша салалық мекемелерге 136 хаттамалық тапсырма мен ұсынымдар енгізілді.
Бұдан бөлек, биылғы жылдың 6 айында фракция мүшелері тарапынан түрлі мекемелерге 80 депутаттық сауал жолданған.
Қоғаммен кері байланыс орнату мақсатында фракция мүшелері алты айда 148 түрлі шараға қатысқан. Қоғамдық қабылдау бөлмелері мен елді мекендерде 93 қабылдау өткізген. Онда 279азаматтың өтініші қаралып, 109-ның оң шешім табуына ықпал еткен. Қалған 170-не заң аясында түсініктемелер берілді.
Жыл басынан депутаттық фракцияның барлық өкілдері партияның сайлауалды бағдарламасымен таныстыру мақсатында аймақтың беделді тұлғаларымен және қоғамдық пікір көшбасшыларымен канвассинг кездесулер өткізді. Халық қалаулылары #Депутатқасауалқой хэштегімен әлеуметтік желілерде тікелей эфирлер өткізіп, халықты Жол картасының іске асырылу барысымен таныстырды.
Жиында партия облыстық филиалы төрағасының бірінші орынбасары Д.Бейсенқұлов биылғы жылдан фракция мүшелерінің қызметін бағалау рейтингісі бекітілгендігін атап өтіп, халық қалаулыларына қоғамдағы мәселелерді шешуде белсенді болу керектігін жетікізді.
Фракция отырысы соңында қаулы қабылданып, бірқатар мәселелер бақылауға алынды.
