Тараз қаласында оқушыларды «Жас Ұлан» ұйымына қабылдау рәсімі болып өтті
Бүгін Тараз қаласындағы 3 мектеп — лицейінде оқушыларды «Жас Ұлан» балалар мен жасөспірімдер ұйымына қабылдау рәсімі болып өтті, — деп хабарлайды «ZhambylNews» Ақпараттық Агенттігі.
«Жас Ұлан» ұйымының мақсаты — оқушылардың әлеуметтік, қоғамдық және шығармашылық қабілеттерін дамыту, жастардың патриотизм рухын ояту.
— Құрметті оқушылар! Сіздер үшін бүгін маңызды күн. «Жас Ұланға» қабылдана отырып, біздің бар үмітімізді ақтайсыздар деп сенеміз. Алдағы белестерден сүрінбей өтулеріңе тілектеспіз, — деп мектеп директоры Зәуре Сәдуақасқызы ізгі ниетін арнады.
Іс-шара соңында оқушылар ант қабылдап, концерттік бағдарлама қойды.
Айта кетейік, республикалық бірыңғай «Жас ұлан» балалар және жасөспірімдер ұйымы Елбасы Н.Ә.Назарбаевтың бастамасы бойынша құрылған. Бұл ұйым қоғамдық ұйым болып табылады.
