Жамбыл облысында 93 мектептің оқушылары қашықтан білім алуда

0 0

Оқу жылының үшінші тоқсанында Жамбыл облысындағы аудан және қала орталығында орналасқан, меншік нысанына қарамастан білім алушылар саны 600-ден асатын барлық жалпы білім беру ұйымдары қашықтан оқыту форматына ауысты. Бұл туралы ӨКҚ баспасөз брифингінде аймақтағы білім басқармасының басшысы Бейқұт Жамангозов баяндады , – деп хабарлайды “ZhambylNews” АА.

Ал оқушылар санына қарамастан барлық ауылдық мектептер, сондай-ақ білім алушылар саны 600 оқушыға дейінгі қалалық мектептер штаттық форматта жұмысын жалғастыруда. Оқытуды штаттық форматта ұйымдастыру кезінде «бір кабинет – бір сынып» қағидаты және санитариялық-эпидемиологиялық талаптар қатаң сақталуда.

«Қашықтан оқыту форматына көшірілген барлық білім алушылар компьютерлік техникамен қамтылды. Жалпы өңірдегі 478 білім беру ұйымында 245 623 оқушы бар. 478 мектептің 330-ында 600-ге дейін, 148-інде 600-ден аса оқушы бар. Қазіргі таңда аудан орталықтары мен қалада орналасқан 93 мектеп қашықтан оқытуға жіберілді. Олардағы 1-2 сыныптар штаттық режимде оқиды. Яғни, 93 мектепте 122 905 оқушы болса, соның 84 252-сі қашықтан, 38 653-і штаттық білім алып жатыр», – деді Бейқұт Тлебалдыұлы.

Спикердің мәліметінше, 600 оқушыға дейінгі оқушылары бар қалған 385 мектеп штаттық форматта, санитарлық талаптарды сақтап жұмысын жалғастыра береді.

Leave A Reply

Your email address will not be published.