Жамбыл облысының әкімі Бердібек Сапарбаев Тараз қаласындағы бірқатар білім нысандарын аралап, жай-күйімен танысты , — деп хабарлайды «ZhambylNews» АА облыс әкімінің баспасөз қызметіне сілтеме жасап.
Алдымен аймақ басшысы М.Мәметова атындағы №27 орта мектепке барды. Іргетасының қаланғанына 80 жылдан асқан білім ордасының ғимараты бүгінде ескіріп, тозығы жеткен. 425 орынға арналған бұл мектепте бүгінде 600-ден аса бала білім алуда. Нысан үш негізгі корпустан тұрады.
Бердібек Сапарбаев мектептегі оқу кабинеттерін аралап, сабақтар барысымен танысты. Оқушыларды әңгімеге тартып, оларды сабақты жақсы оқып, тәрбиелі, саналы ел азаматы болып қалыптасуға шақырды.
Мектеп директоры Әзиза Алтынбаева былтырғы түлектердің ҰБТ көрсеткіші 93 пайызды құрағанын атап өтті. Сондай-ақ, ол ата-аналардың өтініші ретінде жаңа мектеп салу мәселесін көтерді.
Облыс әкімі жыл сайынғы оқушылар санының өсімін ескеріп, бұл мәселенің шешілетінін айтты. Білім, құрылыс басқармалары мен Тараз қаласы әкімдігіне жаңа мектеп салынатын орынды нақтылау және құжаттарды тезірек әзірлеу бойынша тапсырмалар жүктеді. Білім ошағының ескі ғимараттарын да тиімді пайдалану керектігін жеткізді.
Келесі кезекте Бердібек Сапарбаев қаладағы №6 орта мектепке ат басын бұрды. 610 орынға негізделген бұл мектепте 1000-нан астам бала оқуда. Бұл туралы мектеп директоры Асима Төреқұлова баяндады. Мектептің кабинеттерімен таныстырған ол спорт залдың ыңғайластырылған екі кабинеттен жасалғанын айтып, қосымша құрылыс ретінде жаңа, кең спорт зал салып беруді сұрады. Сондай-ақ, АКТ залының, асхананың жоқтығын, кабинеттердің жетіспеушілігіне де назар аудартты.
Аймақ басшысы құрылыс басқармасына спорт зал салу үшін құжаттардың бір айда әзірлеп, құрылыс жұмыстарын келер жаңа оқу жылына дейін аяқтауды тапсырды. Ал қалған мәселелер бойынша жауаптыларға зерделеу жұмыстарын жүргізуді жүктеді.
— Қазір балаларға білім берумен қатар, тәрбиесіне де баса назар аударуға тиіспіз. Олардың бос уақыттарын ұтымды ұйымдастыру қажет. Спорт залдармен қамтып, түрлі өнер үйірмелеріне қатысуына жағдай жасау керек. Ол үшін мектептердің спорт залдарын да тиімді пайдалану маңызды. Балалар мен жастар үшін олар кешкі уақытта да, демалыс күндері де қолжетімді болуы тиіс,-деді Б. Сапарбаев.
Облыс әкімі бұл күні Жамбыл политехникалық Жоғары колледжінің жұмысымен де танысты. Мұнда қазір 2500-ден аса студент білім алуда.
Колледж 2 оқу корпусы, 2 өндірістік корпус, жалпы 320 орынды құрайтын 2 жатақханадан тұрады. Кітапханалар, спорт залы, спорт алаңдары, оқу кабинеттері, зертхана, компьютерлік сынып, оқу шеберханалары жұмыс жасайды.
Директор Дүйсенбек Абдраимовтың айтуынша, оқу ордасында кейінгі жылдары «Ақпараттық жүйелер», «Химиялық технология және өндіріс», «Электр және электро механикалық жабдықтарды техникалық пайдалану, жөндеу және қызмет көрсету» және «Ғимараттар мен құрылыстарды салу және пайдалану» мамандықтарының оқу шеберханалары мен зертханалары қайта ұйымдастырылған.
Сонымен қатар, «Жас маман 2019-2020» жобасы аясында 380 млн. теңге бөлініп, «Автомобильдерге техникалық қызмет көрсету, жөндеу және пайдалану», «Механикалық өңдеу, бақылау-өлшеу аспаптары және автоматика» мамандықтары бойынша шеберханалар мен зертханалар ашылып, заманауи шетелдік жабдықтар сатып алынған. Жуырда ғана колледж қаражаты есебінен қолға алынған оқу гараждарының құрылысы аяқталып, «Жас маман» жобасы шеңберінде сатып алынған жабдықтар орналастырылды.
Студенттердің қол өнер бұйымдары және жұмыстарымен, жас спортшылардың жетістіктерімен танысқан Бердібек Сапарбаев колледж жұмысына жақсы баға берді. Сұранысқа сай кәсіби мамандар даярлау – басты талап екенін атап өтіп, осы бағыттағы жұмыстарды қарқынды түрде жалғастыру керектігін айтты.
Оқу ғимараттарының шатырын ауыстыру, жатақхананы күрделі жөндеуден өткізу мәселесіне қолдау болатынын жеткізген аймақ басшысы тек құжат әзірлеу шараларын жеделдету керектігін баса айтты.
