Бүгін Сенаттың жалпы отырысында қылмыстық кірісті заңдастыру мен лаңкестікті қаржыландыруға қарсы әрекет жөніндегі құжат қаралды.
Талқылаудан кейін палата депутаттары «Қылмыстық жолмен алынған кірістерді заңдастыруға және терроризмді қаржыландыруға қарсы іс-қимыл жөніндегі Еуразиялық топ туралы келісімге және Қылмыстық жолмен алынған кірістерді заңдастыруға және терроризмді қаржыландыруға қарсы іс-қимыл жөніндегі Еуразиялық топтың бюджетін қалыптастыру және атқару тәртібі туралы ережеге өзгерістер енгізу туралы хаттаманы ратификациялау туралы» Заңды мақұлдады.
— Негізгі өзгерістер келесі бағыттарға қатысты. Біріншіден, 2012 жылы FATF (Ақшаны жылыстатуға қарсы күрестің қаржылық шараларын әзірлеу тобы) ұсынымдары ауқымды түрде қайта қаралып, мандаты кеңейтілді. Нәтижесінде жаппай қырып-жою қаруын таратуды қаржыландыруға қарсы іс-қимыл мәселелері қосылды. Екіншіден, Хаттамада «ерікті жарна», «нысаналы ерікті жарна», «өзге түсімдер», «нысаналы қор» деген ұғымдық аппарат анықтамаларымен толықтырылды. Осылайша, Еуразиялық топтың бюджетін қалыптастыру көздері күшейтілді, сондай-ақ, басқа да техникалық түзетулер енгізілді, — деді сенатор Бекболат Орынбеков.
Оның айтуынша, топқа мүше 9 мемлекеттің 7-еуі Хаттаманы ратификациялады. Ал, Қазақстан мен Қытай бұл құжатты ратификациялау бойынша ішкі мемлекеттік рәсімдерін жүргізіп жатыр. Құжатты ратификациялау, ұлттық заңнаманы жаппай қырып-жою қаруын таратуды қаржыландыруға қарсы іс-қимылды қоса алғанда, FATF-тың жаңартылған стандарттарына сәйкес келтіруге, рәсімдер мен терминологияны біріздендіру есебінен қаржылық мониторинг жүйесін оңтайландыруға, сондай-ақ Еуразиялық топ аясындағы халықаралық ынтымақтастықты нығайтуға мүмкіндік береді.
— Сонымен қатар, Хаттамадағы түзетулер Еуразиялық топ мақсаттары мен міндеттерін, үлестік жарналарды төлеудің параметрлері мен мерзімдерін нақтылауға, қосымша жұмыс форматтарын құруды регламенттеуге және қазіргі бар кемшіліктерді жоюға бағытталған. Заңның қабылдануы теріс әлеуметтік-экономикалық және құқықтық салдарға әкеп соқпайды, республикалық бюджеттен қосымша қаржы шығындарын талап етпейді, — деді депутат.
Еске салсақ, Парламент Мәжілісі бұл заңды биыл ақпан айында қабылдаған еді.
