Африканың соңғы абсолюттік монархы, Свазиленд патшасы Мсвати III мемлекетін Эсватини патшалығы деп өзгертті. Жаңа атау свати тілінен аударғанда «Свази жері» дегенді білдіреді.
Бұл туралы Reuters агенттігі хабарлады.
Патша өзінің шешімін Свази халқының тәуелсіздігінің 50-жылдығы және Мсвати III-тің 50-жылдығына орай өткен мерекелік салтанатта жариялады. Ол мемлекет атауын басқалар Швейцариямен шатастырмасын деп, өзгерткен екен.
«Қайда барсақ та, адамдар бізді Швейцария деп атайды (Свазиленд – Швейцария)»,-дейді Мсвати ІІІ.
Эсватини ОАР мен Мозамбик арасында Оңтүстік Африкада орналасқан. Патшалық 1968 жылы Ұлыбританиядан тәуелсіздік алып, жеке мемлекет болып бөлінді. Эсватинидің халқы шамамен 1,35 миллион адамды құрайды, бірақ бұл көрсеткіштің өзі нақты болмауы мүмкін. Елдегі ересектердің 26,1 пайызы иммун тапшылығы вирусын жұқтырған.
Айта кетейік, 2013 жылы шетел басылымдарында Мсвати III-тің тағы да үйленгені хабарланған болатын. Оның 15-ші әйелі Синдисва Дламини сұлулық байқауының 18 жасар финалисті болды.
