Дәл қазіргі уақытта Жамбыл облысының әкімі Асқар Мырзахметовтың қолдауымен Тараз қаласындағы «Баласағұн» ОКЗ-да дәстүрлі «Жамбыл – менің жай атым, халық – менің шын атым!» республикалық ақындар айтысы өтіп жатыр, — деп хабарлайды «ZhambylNews» Ақпараттық Агенттігі.
Айтысты «Айтыс ақындары мен жыршы, термешілердің Халықаралық Одағы» республикалық қоғамдық бірлестігінің төрағасы, ақын Жүрсін Ерман жүргізуде.
Қазылар алқасының төрағасы айтыскер ақын, Қазақстанның еңбек сіңірген қайраткері, Мемлекеттік «Дарын» сыйлығының иегері Аманжол Әлтаев. Сондай-ақ қазылардың қатарында композитор, Қазақстанның, Қырғыстанның халық әртісі Алтынбек Қоразбаев, айтыскер ақын, Мемлекеттік «Дарын» сыйлығының иегері Бекарыс Шойбеков, ақын, журналист, «Ана тілі» газетінің бас радекторы Жанарбек Әшімжан, айтыскер ақын, Қазақстан Жазушылар Одағының мүшесі Бауыржан Халиолла, ақын, Қазақстанның еңбек сіңірген қайраткері, Қазақстан Жазушылар және Журналистер Одағының мүшесі Қайырбек Асанов, айтыскер ақын, ҚР Мәдениет саласының үздігі Ахметжан Өзбеков бар.
Аламан айтысқа Аспанбек Шұғатаев (Павлодар облысы), Қайнар Алагөзов (Ақтөбе облысы), Айбек Қалиев (Қостанай облысы), Дидар Қамиев (Қарағанды облысы), Талғат Мықи, Бауыржан Ширмединұлы (Батыс Қазақстан облысы), Олжас Отар (Астана қаласы), Мұхтар Ниязов (Қызылорда облысы), Нұрлан Есенқұлов (Түркістан облысы) және 8 ақын облыстық ақындар айтысының жеңімпаздары Алтынкүл Қасымбекова, Қанат Мырзахан, Асхат Қылышбек, Нұрлыбек Құрманов, Дархан Әбдіманат, Шапағат Әбдір, Ербол Елшат, Медеу Мырзатай сынды 20 айтыскер қатысып жатыр.
Республикалық айтыстың Бас жүлдесі – автокөлік, І, ІІ, ІІІ орындар мен ынталандыру үшін ақшалай сыйлықтар тағайындалды.
Еске сала кетейік, айтыс өнерін насихаттау, ұрпақтан – ұрпаққа жеткізу жас ақындарды анықтау, олардың шеберлігін шыңдау мақсатында 2019 жылдың қаңтар айының 14-29 күндері аралығында барлық аудандар мен Тараз қаласында аудандық іріктеу шаралары ұйымдастырылды. Аудандық мәдениет және тілдерді дамыту бөлімдеріне алдын-ала іс-шараның ережесі, өту кестесі бекітіліп, жіберілді. Айтыстың басты ұйымдастырушысы облыстық мәдениет, архивтер және құжаттама басқармасы тарапынан ақындар айтысының жоғары дәрежеде өтуіне барынша жағдай жасалды. Нәтижесінде облыс бойынша барлығы 100-ге жуық талапкерлер іріктеліп, 32 ақын облыстық ақындар айтысына қатысты, одан іріктелген 8 ақын оның 3-уі жас ақындар республикалық аламанға жолдама алды. Осы 8 ақынға бюджеттен қаражат бөлініп, жаңа костюмдер тіктірілді. Бұл үрдіс алдағы жылдары да жалғасын табатын болады.
