Жуырда облыс әкімдігі жастар саясаты мәселелері басқармасының ұйымдастыруымен Жамбыл облысы әкімінің кубогы үшін «Ойдода» интеллектуалды ойыны өтті. Аталған додада Жамбыл ауданынан қатысқан «Жамбыл жастары» командасы І орынды иемденді. Енді жерлестеріміз тамыз айында Нұр-Сұлтан қаласында өтетін сайыста аймақ намысын қорғайтын болады, — деп жазады “Zhambylnews” AA.
Додада Түркістан, Алматы облыстары мен Шымкент, Тараз қалалары және облыс аудандарынан келген 14 команда өзара бақ сынап, түрлі тақырыптардағы сауалдарға жауап берді. Әр кезең сайын сайыс сұрақтары күрделене түскенімен білімге сенген жастар барлығына тез әрі нақты жауап беруге тырысты.
Зияткерлік ойынның қорытындысы бойынша барлық қарсыластарын айқын басымдықпен ұтып, қапы қалдырған ауданымыздың «Жамбыл жастары» (Жамбыл ауданы) командасы І орынды иемденіп, облыс әкімінің кубогіне қол жеткізді. Сондай-ақ, тараздық «Ұлы сегіздік» командасы ІІ орынды олжаласа, түркістандық «Эрудит» командасы ІІІ орынға тұрақтады. Бұған қоса, «Жамбыл жастары» командасының ойыншысы Нариман Бекетов «Үздік ойыншы» аталымын жеңіп алды.
Сайыс жеңімпазы мен жүлдегерлеріне арнайы дипломдар мен қаржылай сыйақы табыс етілді.
