Облыс әкімі М.Х. Дулати атындағы ТарӨУ-нің үздік түлектеріне диплом тапсыру салтанатына қатысты

Жамбыл облысының әкімі Нұржан Нұржігітов М.Х. Дулати атындағы Тараз өңірлік университетінің 2023 жылдың үздік түлектеріне диплом тапсыруға арналған салтанатты шараға қатысты.

Аталған университеттің түлектері, ұстаздар мен ата-аналар қатысқан шарада аймақ басшысы барлық жиналғандарды осынау мерейлі күнмен құттықтап, түлектерге сәттілік тіледі.

— Сіздер мектептен алған білімдеріңізді жоғарғы оқу орнында жетілдіріп, жас маман атанып, жаңа өмірге қадам басқалы тұрсыздар! Дана халқымызда «Білекті – бірді жығар, Білімді – мыңды жығады» — деген жақсы сөз бар! Білім мен тәрбиені, соған сай еңбексүйгіш қасиетті бойына сіңірген адам бәсекеге қабілетті маман атанып, ел дамуына мол үлесін қосатыны анық. Осы орайда ертеңгі ел тұтқасы, жарқын болашағы ретінде жастарға үлкен үміт, зор сенім артылады. Сол сенімді ақтау – Сіздердің мерейлі міндеттеріңіз! Бүгінгі таңда мемлекетімізде білім аламын деген жастар үшін мол мүмкіндіктер бар. Мемлекет басшысының тапсырмасымен, Үкімет және жергілікті билік тарапынан білім саласына айрықша көңіл бөлінуде. 2022-2023 оқу жылында жергілікті бюджет есебінен жоғары оқу орындарына бакалавриатқа 30 грант, резидентураға (медицина) 30 грант бөлінген. Келер оқу жылына жергілікті бюджет есебінен бұл бағытта 90 орын грант бөлінуде. Өңірдегі жоғарғы оқу орындарының ішінде М.Х.Дулати атындағы Тараз өңірлік университетінің алар орны ерекше. Алпыс жылдан аса тарихы бар оқу ордасының өткені мен бүгіні қаншалықты мақтанышты болса, келешегі де біздері үшін соншалықты маңызды болмақ,-деді Нұржан Нұржігітов.

Айта кетейік, бүгінгі таңда университет қабырғасында он бес мыңнан астам жас білім алуда.Биыл 3 800-ден аса түлек оқу бітіріп жатса, соңғы бес жылда университет қабырғасында 25 000 астам маман даярланған.

Айрықша атап өту керек, М.Х.Дулати атындағы Тараз өңірлік университеті мен Д.И.Менделеев атындағы Ресей химия-технологиялық университеті және еліміздегі химия өнеркәсібінің негізгі жұмыс берушісі «Қазфосфат» ЖШС арасында «Қос диплом» бағдарламаларын іске асыру бойынша ынтымақтастық туралы үш жақты келісім жасалды.

Бұл – Дулати университеті, «Қазфосфат» ЖШС және Д.И.Менделеев атындағы Ресей химия-технологиялық университетінің бірлескен жобасы.

Сондай-ақ, «Ташкент ирригация инженерлері және ауыл шаруашылығын механизациялау институты» Ұлттық зерттеу университеті арасында да қосдипломдық білім беру бағдарламасын жүзеге асыру бойынша меморандумға қол қойылды.

Мұндай бірлескен жобалар өңірімізге қажетті білікті мамандарды даярлауда өз нәтижесін береді деп сенеміз.

Жалпы, бұл игі шаралар білім мен ғылымның ілгері дамуына жетелейтіндігін тілге тиек еткен аймақ басшысы бірқатар магистрантарға дипломдарын табыстады.

М.Х.Дулати атындағы Тараз өңірлік университетінің басқарма төрағасы-ректор Мұхтар Байжұманов та өз ізгі тілегін білдіріп, оқу орнының жетістіктеріне тоқталды.

Сондай-ақ, Жамбыл облысы маслихатының төрағасы Абдалы Нұралиев, облыс прокуроры Нұрғалым Әбдіров, ҚР Мемлекеттік қызмет істері агенттігінің Жамбыл облысы бойынша департаментінің басшысы Лесбек  Ілебаев, Тараз қаласының әкімі Бақытжан Орынбеков, Ұлттық ғылым академиясының академигі, техника ғылымдарының докторы, профессор Жүсіпбек Сүлейменов, Тараз қаласының құрметті азаматы Батырбек Құлекеев, Тараз қалалық маслихатының төрағасы Кенжебек  Олжабай та университеттің белсенді әрі  үздік бітірушілеріне дипломдарын тапсырды.

Кеш барысында үздік бітірушілер де өз ризашылығын жеткізіп, алдағы уақытта ел дамуы жолында аянбай еңбек ететіндеріне сендірді.

Салатанатты шара түлектердің университет гимін әуелете шырқауымен түйінделіп, отшашуға ұласты.