Жаңатас қаласындағы Орталық саябақта «Білімді ұрпақ – жарқын болашақ кепілі» атты аудан әкімінің оқушылармен кездесуі өтті. Шараға аудан мектептерінен іріктелген көшбасшы, белсенді оқушылар мен жас буын өкілдері қатысты.
Кездесудің негізгі мақсаты – жастардың білімге деген қызығушылығын арттыру, олардың ой-пікірін тыңдау, заманауи қоғамдағы жастардың рөлін айқындау және болашаққа бағыт-бағдар беру болды. Сондай-ақ мемлекет тарапынан жастарды қолдауға бағытталған мүмкіндіктер мен бағдарламалар туралы ақпарат беру мәселесіне де ерекше көңіл бөлінді.
Жиында аудан әкімі Сәкен Үмбетұлы жастарға жылы лебізін білдіріп, ел болашағы білімді, бәсекеге қабілетті жастардың қолында екенін атап өтті. Ол қазіргі заманның басты талабы – білім мен технологияны меңгеру, жаңа идеяларды жүзеге асыру және үнемі даму екенін айтты.
Аудан басшысы өз сөзінде жастардың қоғамдағы орны ерекше екенін жеткізіп, олардың белсенділігі мен ізденісі елдің дамуына тікелей әсер ететінін атап өтті. Сонымен қатар ол әрбір жастың өз саласында үздік болып, туған жерінің өркендеуіне үлес қосуы қажеттігін айтып, жас буынды мақсатшыл болуға шақырды.
Кездесу барысында жастар өз өнерлерін ортаға салып, шығармашылық қабілеттерін көрсетті. Оқушылардың орындауындағы ән, би және түрлі өнер нөмірлері шараның сәнін келтіріп, қатысушыларға көтеріңкі көңіл күй сыйлады.
Сонымен қатар іс-шара аясында сұрақ-жауап форматы ұйымдастырылып, жастар аудан әкіміне өздерін толғандырған мәселелер бойынша сұрақтар қойды. Қойылған сауалдарға нақты әрі түсінікті жауаптар беріліп, білім беру, жастар саясаты және болашақ мамандық таңдау тақырыптары кеңінен талқыланды.
Кездесу соңында аудан әкімі белсенді қатысқан және өнер көрсеткен оқушыларға естелік сыйлықтар табыстап, олардың еңбегін ерекше атап өтті. Мұндай ашық форматтағы кездесулер жастар мен билік арасындағы байланысты нығайтып, олардың пікір алмасуына мүмкіндік береді.
Жалпы, «Білімді ұрпақ – жарқын болашақ кепілі» атты кездесу жастардың рухын көтеріп, олардың білімге, өнерге және қоғамдық өмірге деген қызығушылығын арттыруға ықпал етті.
