Қазақстандық боксшы қыздар Сербиядағы турнирде жартылай финалға шықты

Белградта әйелдер арасындағы бокстан халықаралық Belgrade Winner турнирінің ширек финалының бірінші күні өтіп. азақстандық алты спортшы қыз бақ сынады. Олардың үшеуі жеңіске жетіп, жартылай финалға шықты, — деп хабарлайды «ZhambylNews» АА Оlympic.kz-ке сілтеме жасап.

Жайна Шекербекова (51 келі) төрешілердің бірауыздан шығарған шешімі бойынша Сербия чемпионы Нина Радовановичті жеңіп кетті. Карина Ибрагимова түркиялық Ислем Ферчичиден басым түсті. Ал Айжан Ходжабекова украиналық Мария Пасечноймен қолғап түйістіріп, бағы жанды.

Өкінішке орай, Айгерім Қасенаева (51 келі), Дәметкен Келімбет (57 келі) және Баян Ақбаева (69 келі) жарыс жолынан шығып қалды. Сондай-ақ, бүгін Әлия Әбдраимова (64 келі) шаршы алаңға шығады.

Қазақстандық боксшы қыз хорватиялық Майя Саричпен жұдырықтасып, финалдық жолдамаға таласатын болады. Жеребе тарту рәсімі бойынша, Әлия турнирді жартылай финалдық кезеңнен бастайды.

Естеріңізге сала кетсек, Аида Оңдаш пен Умида Садықова бірден финалдық бәсекеде бақ сынайтын болады. Осылайша, қазақстандық құрама Сербиядағы турнирде 6 медальден үмітті екендерін мәлімдеді.