Медицина қызметкерлері күні қарсаңында Жамбыл облысында ақ халатты абзал жандар арасында дәстүрлі облыстық спартакиада ұйымдастырылып, өз мәресіне жетті. Жақсылық Үшкемпіров атындағы «Тараз-Арена» спорт сарайында өткен ауқымды спорттық шара медицина саласы қызметкерлерінің дене шынықтыру мен салауатты өмір салтын насихаттаудағы белсенділігін тағы бір мәрте айқын көрсетті.
Спартакиаданың негізгі мақсаты – медицина қызметкерлері арасында бұқаралық спортты дамыту, ұжымдық бірлікті нығайту, салауатты өмір салтын қалыптастыру және әріптестер арасындағы достық қарым-қатынасты арттыру. Дәстүрлі жарысқа облыстың әр өңірінен және медициналық мекемелерінен құралған «Бәйтерек», «Ұлы дала», «Бірлік», «Достық», «Қыран», «Шипагер» және «Жігер» командалары қатысты.
Қатысушылар бірнеше күн бойы спорттың алты түрі бойынша өзара бақ сынады. Атап айтқанда, футбол, волейбол, жеңіл атлетика, шахмат, тоғызқұмалақ және үстел теннисі жарыстары ұйымдастырылды. Әр спорт түрінде командалар жоғары дайындық деңгейін көрсетіп, жеңіс үшін бар күш-жігерін жұмсады. Әсіресе футбол мен волейбол бәсекелері тартысты өтіп, жанкүйерлердің ерекше қызығушылығын тудырды.
Спартакиада барысында медицина қызметкерлері өздерінің кәсіби қызметтен бөлек, спортқа деген қызығушылықтарының жоғары екенін дәлелдеді. Жарыстарда тек жеке шеберлік қана емес, командалық ұйымшылдық, өзара қолдау мен бірлік те басты назарда болды. Бұл өз кезегінде медициналық ұйымдар арасындағы ынтымақтастықты нығайтуға оң әсерін тигізді.
Тартысты өткен жарыс қорытындысы бойынша жалпыкомандалық есепте «Бәйтерек» командасы үздік нәтиже көрсетіп, бірінші орынды иеленді. Аталған команданың құрамында Жамбыл облыстық көпбейінді ауруханасының, облыстық балалар көпбейінді ауруханасының, облыстық жұқпалы аурулар ауруханасының, қан орталығының, арнайы медициналық жабдықтау базасының және «Айша бибі» шипажайының қызметкерлері өнер көрсетті. Бірнеше спорт түрінен жоғары нәтижеге қол жеткізген команда лайықты түрде жеңіс тұғырынан көрінді.
Жалпыкомандалық есепте екінші орынды Меркі және Тұрар Рысқұлов аудандарының медицина қызметкерлерінен құралған «Достық» командасы жеңіп алды. Команда мүшелері жарыс барысында жоғары белсенділік танытып, бірнеше спорт түрінен жүлделі орындарға ие болды.
Ал үшінші орын «Ұлы дала» командасына бұйырды. Бұл құрамда қалалық көпбейінді аурухананың, ЖИТС-тің алдын алу және оған қарсы күрес орталығының, жоғары медициналық колледждің және облыстық патологоанатомиялық бюроның қызметкерлері бақ сынады. Команда мүшелері жарыстың барлық кезеңінде ұйымшылдық пен табандылық танытып, үздік үштіктен көрінді.
Жарыстың жабылу салтанатында жеңімпаздар мен жүлдегерлер арнайы кубоктармен, дипломдармен, медальдармен және ақшалай сертификаттармен марапатталды. Ұйымдастырушылар барлық қатысушыларға алғыс білдіріп, мұндай спорттық іс-шаралардың ұжымдық рухты көтеріп, медицина қызметкерлерінің денсаулығын нығайтуға ықпал ететінін атап өтті.
Медицина саласының мамандары күнделікті қызметінде адам денсаулығын қорғап, тұрғындарға сапалы медициналық көмек көрсету жолында еңбек етеді. Сондықтан олардың өз денсаулығына көңіл бөліп, спортпен тұрақты айналысуы ерекше маңызға ие. Осы тұрғыдан алғанда, облыстық спартакиада дәрігерлер мен медицина қызметкерлерінің дене белсенділігін арттырып қана қоймай, олардың бос уақытын тиімді ұйымдастыруға мүмкіндік берді.
Жақсылық Үшкемпіров атындағы «Тараз-Арена» спорт сарайында өткен бұл жарыс спорт пен салауатты өмір салтының мерекесіне айналды. Сонымен қатар медицина қызметкерлерінің кәсіби шеберлігімен қатар, спорттық дайындықтары мен ұйымшылдығын да айқын көрсетті. Спартакиада қатысушылары келесі жылы өтетін жарыстарда да жоғары нәтиже көрсетуге ниетті екендіктерін білдіріп, мұндай игі бастамалардың жалғаса беруіне тілектестік танытты.
Облыстық спартакиада медицина қызметкерлерінің бірлігін нығайтып, олардың қоғамдағы белсенді әрі салауатты өмір салтын ұстанатын азаматтар екенін тағы бір мәрте дәлелдеген маңызды шара ретінде есте қалды.
